ત્રીજા સ્મશાન મુદે નગરયાત્રા

    જામનગરમાં વસતિ તથા વિસ્તાર વધ્યો હોય ત્રીજાં સ્મશાનની માંગણી સાથે કોંગ્રેસના સમર્થનથી કોર્પોરેટર દેવશી આહિર દ્વારા આંદોલન ચલાવવામાં આવે છે. આ અગાઉ તેમણે ઉપવાસ-ધરણાં પણ કર્યા હતાં. તે પછી ગઇકાલે ગુરૂવારથી તેઓએ નગરયાત્રાનો પ્રારંભ કર્યો છે. શહેરના વિવિધ વિસ્તારોમાં તેઓ ૭ દિવસ ધૂમી લોકજાગૃતિ લાવશે.

    રાજ્ય સરકારે રણજિતસાગર રોડ પર ત્રીજું સ્મશાન બનાવવાની મંજૂરી આપી છે, મહાનગરપાલિકાને જમીન પણ ફાળવી આપી છે પરંતુ શાસકો બે વર્ષથી આ પ્રોજેકટ શરૂ કરતાં નથી. કોંગ્રેસનો આક્ષેપ એવો છે કે, જમીનના ધંધાર્થીઓના હિતો સાચવવા મહાનગરપાલિકા ત્રીજું સ્મશાન બનાવતું નથી.

    નગરયાત્રાના પ્રારંભે ડો. બાબા સાહેબ આંબેડકરને ફુલહાર કર્યાં હતાં. આ તકે વિક્રમભાઇ માડમ, અલ્તાફ ખફી, યુસુફ ખફી, નિતાબેન પરમાર, મરિયમબેન સુમરા, સાજિદ બ્લોચ, સહારાબેન મકવાણા વગેરે હાજર રહ્યા હતાં. નગરયાત્રા દરમ્યાન ચાંદીબજાર ખાતે આવેલ ગાંધીજીની પ્રતિમાને સુતર પહેરાવી હતી.